Sapno se bhare Naina

Wo nanhi si kali jab is jahaan me aayi

Khushiyo ki saugaat ban sab ke dilo me chaayi

Khubsoorti thi uske kan-kan me samayi

Kami thi gar koi, to bas naino ki roshni

Bin rango ke khili- wo yun mehki

Paas aa kar uske duniya muskuraayi

Nidarr sahasi to use sab keh gaye

Magar rangeen jahaan me wo berang hi rahi

Na use koi dard na afsos kabhi

Dil ki aankho se wo har nazaara khud me samayi

Bin roshni hi usne apni duniya sajayi

Apne jahaan ko apne hi tulika se bhari

Hazaaron khwahisho mein bas ek khwab aisa

Masumiyat kaho ise- par sapno se bhare the uske bhi naina

Mil jaata agar koi jo use apna kehta

Bahari sundarta chod uske dhadkano ko pehchanta

Na din ki khabar na raat ka koi pata

Waqt ko na jaane kaise usne mehsus kiya

Saanj-savere usne kiya intezaar bepanah

Fir takraya ittefaq se rajkumar uska

Na chaha usne uski khubsoorti na hi mehek

Bas dekha usne un bhole naino ki chamak

Apne sapne chod uske sapno ko pura karne ka junoon tha 

Jinhe pehle kabhi koi dekh bhi na saka

Mohabbat ke roop to kai hote hain

Ab inke ishq ki kya daastaan sunau?-

Palkon par basi lamho se saji

Indradhanush se bhi khubsooat

Bani sang-sang dono ki zindagi

Khushyian unhone itni gholi sath-sath

Jise na haasil kar paaye koi aam insaan

Bin roshni jo kali thi khili

Aaj wo khud ko roshan kar murjhayi